Huwa skandaluż li ftit wara li l-Istat u l-Kabinett jinstabu responsabbli għall-qtil brutali ta’ ġurnalista, issa għandna ġurnalista li jkollu jwaqqaf programm minħabba l-indħil f’xogħolu mill-istazzjon nazzjonali.
Repubblika tqis li dan huwa fatt gravi ħafna. Il-fatt li l-indħil lill-ġurnalista Mark Laurence Zammit qed isir mill-istazzjon nazzjonali ifisser li dan huwa abbuż ferm aktar gravi. L-istazzjon mħallas mit-taxxi u li suppost huwa imparzjali u mhux strument tal-Gvern biex jaħbi l-ħmieġ tiegħu.
Aħna nistqarru li m’għandniex fiduċja fil-Ministru Karmenu Abela li suppost huwa responsabbli mix-xandir nazzjonali. Il-Ministru Abela ma kellux il-ħila jerfa’ r-responsabbiltà ta’ għemilu meta nstab ħati ta’ imġieba mhux xierqa mill-Kummissarju għall-Istandards. Aħseb w’ara kemm għandu saħħa morali biex jesiġi li x-xandir nazzjonali iwettaq dmiru.
Repubblika tistqarr li l-Prim Ministru għandu d-dmir li jinvestiga dan l-indħil u jiddixiplina lil min hu responsabbli. Għandu l-obbligu li jinforma lill-poplu Malti b’dak li sab u bil-passi li ħa.
Ma jistax ikun li pajjiżna jibqa’ jogħdos f’dawn l-abbużi u ħadd ma jġorr ir-responsabbilità.
Jekk Il-Prim Minstru Robert Abela ma jagħmel xejn, ifisser li Dr Abelaq ħa fuqu ir-responsabbiltà tal-abbuż imwettaq.
Repubblika tiddikjara li mhux se tieqaf taħdem favur l-imġieba xierqa mill-uffiċjali tal-Istat Malti, tiddefendi l-ġurnaliżmu ħieles u kontra l-impunità li hija mifruxa ma’ kullimkien.