Repubblika tingħaqad mas-sejħiet dejjem jiżdiedu minn organizzazzjonijiet tas-soċjetà ċivili madwar id-dinja għal waqfien immedjat tal-ostilitajiet u għal ritorn għad-diplomazija fil-Lvant Nofsani.
Ir-rikors għal azzjoni militari unilaterali mill-Istati Uniti u mill-Iżrael, barra mill-qafas tad-dritt internazzjonali, idgħajjef l-istabbiltà globali u jpoġġi f’riskju l-popolazzjonijiet ċivili. L-eskalazzjoni militari, fejn tkun qed isseħħ, iżżid ir-riskju ta’ kunflitt aktar mifrux u tkabbar it-tbatija ta’ nies innoċenti. Il-ħarsien tal-ħajja taċ-ċivili u r-rispett lejn id-dritt umanitarju internazzjonali għandhom dejjem jibqgħu prijorità.
Fl-istess ħin, ir-rispett lejn id-dritt internazzjonali jitlob konsistenza. Repubblika tingħaqad mal-kundanna mifruxa fuq livell internazzjonali tal-imġiba vjolenti u abbużiva tar-reġim Iranjan fil-konfront tal-poplu tiegħu stess u tal-fatt li kontinwament jinjora d-drittijiet fundamentali tal-bniedem. Il-poplu Iranjan ilu għal għexieren ta’ snin iġarrab repressjoni, ċaħda tal-libertajiet politiċi, u ksur sistematiku tad-dinjità u s-sigurtà tiegħu. L-aspirazzjonijiet leġittimi tiegħu għall-paċi, għall-libertà u għal gvern responsabbli jistħoqqilhom l-appoġġ tal-komunità internazzjonali.
Il-kisba tal-ġustizzja u tar-rispett għad-drittijiet tal-bniedem ma tistax tinkiseb permezz ta’ gwerra illegali. Paċi dejjiema fir-reġjun tista’ tinbena biss permezz tar-rispett lejn id-dritt internazzjonali, il-protezzjoni tal-popolazzjonijiet ċivili, u sforzi diplomatiċi kontinwi.
Repubblika tappella lill-Gvern Malti biex jerġa’ jafferma l-impenn storiku ta’ Malta lejn id-dritt internazzjonali, in-newtralità u s-soluzzjoni paċifika tat-tilwim. Malta għandha tuża kull mezz diplomatiku disponibbli biex tappoġġja d-de-eskalazzjoni, tippromwovi d-djalogu u taħdem ma’ msieħba internazzjonali sabiex terġa’ tinkiseb l-istabbiltà u l-paċi.
Malta għandha wkoll tiżgura li bl-ebda mod ma tikkontribwixxi jew tiffaċilita atti ta’ aggressjoni illegali jew ksur tad-dritt internazzjonali.
F’mumenti ta’ tensjoni akbar, il-komunità internazzjonali għandha terġa’ tafferma l-impenn tagħha lejn il-prinċipji li jiżguraw il-paċi: is-saltna tad-dritt, il-protezzjoni tad-drittijiet tal-bniedem, u r-riżoluzzjoni paċifika tat-tilwim.