Il-Prim Ministru Robert Abela ma jistax jibqa’ ċass quddiem l-imġieba tad-Deputat Parlamentari Rosianne Cutajar.
Għalkemm diġà għaddiet ġimgħa minn meta Mark Camilleri ippublika dak li għadda bejn l-Onorevoli Cutajar u l-persuna akkużata bil-qtil ta’ Daphne Caruana Galizia, il-Prim Ministru għadu ma ħa l-ebda azzjoni. Anzi qalilna li l-Onorevoli Cutajar diġà ħallset ta’ għemilha.
Repubblika tqis li sitwazzjoni bħal din mhix aċċettabli f’pajjiż demokratiku fejn kull min għandu s-setgħa jrid jagħti kont ta’ għemilu.
Li rajna s’issa kien li l-Avukat Ġenerali u l-Pulizija bdew jieħdu passi kontra min kixef dan il-ħmieġ.
Nistennew li ladarba l-Onorevoli Cutajar għadha tqis li l-imġieba tagħha ma fiha xejn ħażin, il-Prim Ministru Abela bħala l-Kap tal-partit tagħha għandu:
- jiddikjara li ma jaqbilx mal-imġeba tal-Onorevoli Cutajar;
- jiddissoċja ruħu u lill-partit tiegħu mill-iġieba tagħha;
- jiżgura li jibdew u jsiru investigazzjonijiet bis-serjetà dwar dak li joħroġ mill-iskambji li ppubblika Mark Camilleri.