Repubblika tikkundanna d-deċiżjoni tal-Ministru Michael Falzon li jinjora mistoqsijiet leġittimi tal-istampa dwar allegazzjonijiet serji ta’ mġieba korrotta u kriminali fl-uffiċju tiegħu. Ministru tal-Gvern hu obbligat iwieġeb dwar allegazzjonijiet ta’ kriminalità fl-istaff tiegħu, imqar biex jiċħadhom. Il-mod kif ta dahru lill-ġurnalisti juri d-disprezz tal-ministri lejn il-pubbliku kollu li għandu dritt jippretendi li l-ministri tal-gvern ma jipproteġux kriminali.
Kien mill-ewwel ċar li l-iskandlu tal-pensjonijiet ta’ diżabilità severa mogħtija lill-persuni li ma kellhom ebda mard jew diżabilità kellu bil-fors jinvolvi involviment u barka politika fl-ogħla livell biex seta’ jitwettaq għal kemm dam għaddej.
Il-persuni li huma kompliċi f’dan l-iskandlu għandhom jiffaċċjaw il-konsegwenzi. U l-ministri li ħallew dan kollu għaddej taħt imneħirhom għandhom jerfgħu r-responsabbiltà.
Michael Falzon għandu jieqaf jaħrab mill-konsegwenzi t’għemilu jew tat-traskuraġni tiegħu.