Din il-kampanja tippromwovi kultura ta’ demokrazija, rispett għad-drittijiet tal-bniedem u l-istat tad-dritt. Se tippubblika kotba għat-tfal u tipproduċi kontenut għar-radju u l-midja soċjali biex tippromwovi ċittadinanza attiva u responsabbli. Kompetizzjoni nazzjonali tal-istudenti se ssir kull sena.
Is-Sindku ta’ Palermo Leoluca Orlando jindirizza lill-istudenti tas-Sixth Form tal-Kulleġġ ta’ San Alwiġi dwar il-battalja tiegħu kontra l-mafja tul ħajtu, fuq stedina minn Repubblika.
Il-lista bla tmiem ta’ reati u forom oħra ta’ abbuż, b’mod partikolari l-assassinju ta’ Daphne Caruana Galizia, u l-imġiba ħażina gravi mifruxa, il-prattiki ħżiena u l-iskandli li l-poplu Malti ra f’dawn l-aħħar snin, żvelaw nuqqasijiet serji ħafna fil-mod kif joperaw l-istituzzjonijiet nazzjonali tagħna u wkoll fis-sistema edukattiva tagħna.
Permezz ta’ din il-kampanja, Repubblika beħsiebha tippromwovi ċittadinanza attiva u responsabbli u kultura ta’ demokrazija, rispett għad-drittijiet tal-bniedem u s-saltna tad-dritt.
Il-kampanja hija bbażata fuq dikjarazzjoni ta’ valuri u prinċipji ppubblikata fuq is-sit elettroniku ta’ Repubblika.
Se tfittex li tippubblika kotba għat-tfal tal-iskola biex tmexxi 'l quddiem l-għanijiet tal-kampanja. Kull sena se ssir kompetizzjoni nazzjonali tal-istudenti li twassal għal Lejla tad-Demokrazija li tiċċelebra x-xogħol tagħhom u l-proġett kollu kemm hu.
Il-kampanja se tieħu wkoll il-forma ta’ promos fuq ir-radju u vidjows fuq il-midja soċjali biex tippromwovi l-valuri u l-prinċipji li fuqhom hija bbażata, u biex tikkundanna l-ħafna mġiba ħażina fis-soċjetà tagħna, inkluż il-patroċinju politiku.
Se tintalab il-kollaborazzjoni ta' NGOs li jaqsmu l-viżjoni ta' Repubblika.
Il-kunsilli lokali se jintalbu japprovaw u jippromwovu b'mod attiv din il-kampanja.
Id-donazzjoni tiegħek lil Repubblika, li ntlaqgħet bi gratitudni, se tgħin biex tħallas parti mill-ispejjeż imġarrba fil-pubblikazzjoni ta’ kotba għat-tfal, biex tipproduċi kontenut għar-radju u l-midja soċjali biex tippromwovi ċittadinanza attiva u responsabbli u biex torganizza kompetizzjoni nazzjonali annwali għall-istudenti.